Di ari papituhon dung lobi tonga ari, so ma gondang I. Ai godang dope sihataan. Marliot ma natorop I manghaliangi na binahen ni Silahisabungan I. Datu marhilap do patupahon I sudena. Di tonga2 ni jolma na marliot I ma ampang I na marisi sagu-sagu marlangan dohot angka sudena I, dohot ate-ate na nirusuk I. Disuru Silahisabungan ma sude hundul anakna I mangalioti ampang I, mulai sian Silalahi,sihaloho,situngkir,sirumasondi,sinabutar,sinabariba
,sinabang,sipintu batu,siraja tambun; I ma sian siamun sahat tu hambirang. Ala dohot disi Silalahi, pintor jongjong ma Siraja Tambun, ninna ma:"Ndang boi dohot dahahang Silalahi dison. Ai ndang marsala Silalahi tu au". Ninna Silahisabungan ma:"Ndang pola boha I doba". Ninna Siraja Tambun ma:"Ah, hamu ma disi, laho ma ahu". Ninna Silahisabungan ma: "Ate ba Silalahin laho ma ho tu sada an". Haruar ma Silalahi sian I. Ditogu ma Siraja Tambun tu lambung ni ampang I. Ninna Silahisabungan ma:"On pe nuaeng, hamuna anakku na ualu. Bahenonku ma parbolatan muna. I ma parbolatan sihaloho dohot anggina na onom I dompak siraja tambun. Na so tupa mardomu. Molo mardomu ingkon rasip. Pintor digoit Siboru Pintahaomasan ma Silahisabungan. Hundul ma nasida na dua di duru ni loloan I. Ninna ma:"On do hudok raja nami, ndang boi songon binahenmi. Aut beha mardomu di pomparan nasida sogot, sotung rasip,sotung marlangan,sotung mate. Aha be pomparanmu..?". Ninna Silahisabungan."Aah, lok ma songon I. Asa dao be langkana", ninna Siboru Pintahaomasan ma:"Oloi ma hatangku.Asa dengan sude". Jadi boha do hape..? Ninna Silahisabungan. "Poda do bahenon", ninna Siboru Pintahaomasan, "Dok ma songon on:............ I do..?, ninna Silahisabungan. "I do", ninna Siboru Pintahaomasan. Hundul ma nasida di lambung ni ampang I. Denggan ma parhundul ni nasida na ualu. Sian siamun sahat tu hambirang. Mulai sian Sihaloho, situngkir, sirumasondi, sinabutar, sinabariba, sinabang, sipintu batu, siraja tambun. Dipaherbang nasida na ualu ma tanganna be diatas ni ampang I. Marlolo ma disi raja-raja adat, datu-datu parbinoto, situan natorop. Disi do siraja oloan, ompu raja nabolon, raja padang batanghari. Ninna Silahisabungan ma: "Di hamu anakku na ualu, Sihaloho, situngkir, Sirumasondi, sinabutar, sinabariba,sinabang, sipintu batu, siraja tambun. On ma pati-patianku tu hamu, on ma poda hu tu hamu, I ma Poda Sagu-sagu Marlangan. I ma na songon parpadanan ni Sihaloho dohot angka anggina na onom on dompak Siraja Tambun:
1. Ingkon masihaholongan ma hamu sahat ro di pomparan muna sogot.
2. Ingkon masipatuduan papaga na lomak do hamu sama hamu sahat ro di pomparan muna sogot.
3. Ingkon sisada roha do hamu na so tupa marbadai.
4. Na so jadi masiolian angka gelleng muna sogot, sisada anak sisada boru.
5. Ho pe hasian Siraja Tambun, nang pe parjolo ho tubu sian na opat on, ima: Sinabutar, Sinabariba, Sinabang, Sipintu batu; tung na so jadi do dohonmu anggim na opat on, haham do na pitu on, anggi ni na pitu on do ho, ai pulik ndang ripe-ripe partubu I songon tangga ni balatuk.
6. Manang ise hamu na mangose padan on: Ingkon songon sagu-sagu marlangan on ma ibana rodi pomparanna sogot, ingkon songon hapur na nilomang, ingkon songon gambir na nilompa, ingkon songon pining na nibola, ingkon songon demban na nisilga, ingkon songon timbaho na nirasip, ingkon songon hubang na nigaor, ingkon songon ate-ate na nirusuk, pusu-pusu ni tostos, limpa na nigomak, raoan na nirabi, ingkon songon I ma hamu dohot pomparan muna sogot molo dilaosi hamu podangkon. On ma parpadanan dihamu songon pati-patian di pomparan muna sogot. Allang hamu na ualu ma ate-ate na nirusuk on bahen parpadanan di hamu.
© 7T